Кожны чалавек, неабыякавы да свайго здароўя і здароўя сваіх нашчадкаў, проста абавязаны пашукаць ды вывучыць інфармацыю пра сытуацыю з ГМ-прадуктамі, іхнымі плюсамі-мінусамі.

Увогуле, карціна атрымліваецца без перабольшваньня палохаючай.

З 90-х гадоў (часу масавага выхаду трансгеннай прадукцыі на рынак) карпарацыі-распрацоўшчыкі ГМА набралі сілу, прадукцыя атрымала вялізны распаўсюд (некаторыя ГМ культуры практычна цалкам выціснулі свае прыродныя аналагі з ужытку), а самі карпарацыі моцна лабіруюцца ў сьвеце нават на ўзроўні прэзыдэнтаў ЗША.

Пры гэтым ніякіх сур'ёзных, працяглых навуковых дасьледваньняў, што пацьвярджалі б бясьпеку ГМА для чалавека, дагэтуль не абнародавана. А што, здавалася б, можа быць прасьцей: узяць дзьве групы паддосьледных пацучкоў, адну зь якіх карміць трансгенамі, іншую - такімі ж прадуктамі, толькі не мадыфікаванымі, а потым параўнаць стан здароўя абодвух папуляцыў у двух-трох пакаленьнях. Такіх дасьледваньняў лабістамі ГМА, якія пасадзілі на свае прадукты палову плянэты, проста не прад'яўляецца! А чаму? Не было такіх вопытаў?

Аказваецца, былі. Дабром для навукоўцаў, як паказала практыка, яны ня скончваюцца. Варта толькі вучонаму заняцца гэтай праблематыкай, як усплываюць жахлівыя рэчы, а на навукоўца абрынаецца "праведны гнеў" прадажнага навуковага істэблішмэнту, яго пазбаўляюць пасады, звальняюць, перакрываюць кісларод, зацкоўваюць. Выглядае, што сёньня на тое, каб узяцца за такія дасьледваньні, ад вучонага патрабуецца не абы-якая грамадзянская мужнасьць. Прынамсі, у гэтым пытаньні непрадажная навука загнана ў жорсткую апазыцыю: дасьледваньні вядуцца пераважна за свой кошт, на голым энтузьязме, бо ўрадамі ды навуковымі ўстановамі такія праекты цяпер папросту не фінансуюцца. Хаця важнасьць пытаньня ўзьдзеяньня ГМА на чалавека і прыроду пераацаніць немагчыма.

Лішне казаць, што галасы з "апазыцыі" вельмі і вельмі трывожныя. Што адбываецца з накормленымі трансгенамі паддосьледнымі жывёлкамі - не палянуйцеся пашукаць самі. Шукаючы, знойдзеце процьму цікавостак.

Занятна: калі ў 2004г. Эўразьвяз увёў забарону на імпарт(!) трансгенаў (WTO пасьпяшался прызнаць яе незаконнай), замовы на шырокамаштабныя і ўсебаковыя навуковыя дасьледваньні датычна трансгенных прадуктаў ня ўзьнікла ўсё адно. "Мы вас труціць нікому не дамо - самі будзем". Захад. Голая эканоміка. На людзкія жыцьці начхаць рашуча ўсім. І гэта страшна.

Так што маю цяпер новую жж-зацікаўленасьць - "грэбаваць трансгеннымі прадуктамі". Замест колішняй "фкусна жраць".